ஹைக்கூவில் ஈற்றடியில் ஏன் பெயர்ச்சொல் வேண்டும்,,,?

 

ஹைக்கூ எழுதும் போது ஈற்றடியில் பெயர்ச்சொல்லையே பயன்படுத்துவது சிறப்பாகும் சரி பெயர்ச்சொல்லென்றால் என்ன,,,?

பெயர்ச்சொல் என்பது ஒன்றன் பெயரை உணர்த்தும் சொல் ஆகும் பொருள், இடம், காலம், சினை, குணம், தொழில் என்னும் ஆறின் அடிப்படையில் பெயர்ச்சொற்கள் தோன்றும். ஆதலால் பெயர்ச்சொல் பொருள் ,இடம் ,காலம், சினை, குணம், தொழில் என்பவற்றைப் பொருளாதி ஆறு என்றும், பொருள் முதலாறு என்றும் கூறுவார்"பெயர்ச்சொல் திணை, பால், எண், இடம் ஆகியவற்றை உணர்த்தி வரும்; வேற்றுமை ஏற்கும், காலம் காட்டாது."

பொருட்பெயர்: மனிதன், பசு, புத்தகம்

இடப்பெயர்: கோவை, தமிழகம்

காலப்பெயர்: மணி, நாள், மாதம்,ஆண்டு

சினைப்பெயர்: கை, தலை

பண்புப்பெயர்:
இனிமை, நீலம், நீளம், செவ்வகம்

தொழிற்பெயர்: படித்தல், உண்ணல், உறங்குதல்

இது தவிர வேறு பல விதமாகவும் வகைப்படுத்துவது உண்டு

ஒன்றின் பெயரை உணர்த்து சொல் பெயர்ச்சொல் எனப்படும் அது இடுக்குறிப்பெயராகவோ அல்லது காரணப்பெயராகவோ இருக்கலாம்

இடுக்குறி என்பது எந்த காரணமும் இல்லாமல் இட்டு வழங்கியப்பெயர்  அதாவது மண்,மலை.மரம் போன்றவை
காரணப்பெயர் என்பது காரணத்தோடு இட்டு வழங்கியப்பெயர் நாற்காலி, முக்காலி , போன்றவையாகும்

ஹைக்கூ கவிதைகளுக்கு முதல் வரியும் கடைசிவரியும் மதிக்கப்படுவதற்கு இடையிலுள்ள இரண்டாம் வரி மிகமுக்கியமானதாகும் என்றாலும் ஈற்றடியில் பெயர்ச்சொல்லை பயன்படுத்தவதே சிறப்பாக அமையும் அப்படியான ஹைக்கூ கவிதைகளே காலத்தை கடந்தும் நிலைக்கும் உங்களுக்கு புகழைப்பெற்றுத்தரும் என்பதை கருத்தில்கொண்டு கவிஞர்கள் ஹைக்கூ கவிதைகளை படைக்க வேண்டும்
இதோ சில கவிதைகள்

மரங்கள் வெட்டப்பட்ட இடத்தில்
புதிதாக முளைக்கிறது
அலைபேசி கோபுரம்,,,!

~நாகை ஆசைத்தம்பி

பூந்தோட்டங்களை
அழித்துவிட்டு வளர்க்கிறார்
தேனீக்கள்

~மா.ஷங்கர்

கோவில் வாசலில்
பக்தரை நம்புகிறான்
பிச்சைக்காரன்

~அன்பழகன்.ஜி

விளக்கை நகர்த்த
அசைந்து கொடுக்கிறது
புத்தரின் நிழல்

~கா.ந.கல்யாணசுந்தரம்

உழவனின் உழைப்புக்கு
தலை வணங்குகிறது
நெல்மணிகள்

~விக்டர் ஏஞ்சல்

மீன்கள் விற்றதும்
இறந்து கிடக்கிறது
மீன்தொட்டி

~தஞ்சை தக்ஷன்

மேற்கு தொடர்ச்சிமலை
இடைவெளிவிட்டு கூவிடும்
கானக்குயில்

~முனைவர் .வே.புகழேந்தி